XESTIÓN DE RESIDUOS
Cabana de Bergantiños impulsa a xestión de residuos con novas campañas de concienciación
O Concello de Cabana de Bergantiños inicia novas campañas de concienciación para mellorar a xestión dos residuos. O obxectivo é cumprir coa normativa europea e reducir os custos de tratamento do lixo, ao mesmo tempo que se coida o medio ambiente.
Contedores marróns
O Concello promoverá o uso dos contedores marróns, dispoñibles desde 2022 en varias zonas do Concello.
- Como usalos? Pide a chave no Concello e deposita os teus residuos orgánicos en bolsas compostables.
- Quen? A campaña diríxese a todos os veciños, bares, restaurantes e comercios de alimentación.
Compostaxe doméstica
O Concello tamén reforza a campaña de compostaxe para as vivendas con finca.
- Que conseguirás? Abono de alta calidade para a túa horta ou xardín.
- Como unirte? Apúntate no Concello para recibir un kit de compostaxe gratuíto despois dunha xornada de formación.
Recollida de aceite usado
Ademais, recordámosche que podes solicitar un novo bidón para o servizo de recollida de aceite de cociña usado.
Con estas iniciativas, o Concello de Cabana de Bergantiños busca a colaboración de todos os veciños para continuar coa transformación da xestión de residuos e conseguir un municipio máis sostible.
